Баасан гарагт Мьянмарт болсон хүчтэй газар хөдөлсний улмаас амиа алдсан хүмүүсийн тоо 1600 давж, хэдэн мянган хүн бэртэж гэмтсэн тухай олон улсын хэвлэлүүд мэдээлж байна. Нурангид дарагдсан хүмүүсийг эрж хайх, аврах ажиллагаа үргэлжилж байгаагийн зэрэгцээ эмнэлгийн хэрэгслийн хомсдол үүссэн болохыг НҮБ анхаарууллаа.
Мьянмарын эрх баригч цэргийнхний өгсөн мэдээллээр 1644 хүн нас барж, 3408 хүн гэмтэж бэртсэн бол хэдэн арван хүн сураггүй болоод байгаа юм.
Мьянмарын цэргийн эрх баригч Мин Аун Хлайн зургаан бүс нутагт онц байдал зарласныг мэдэгдээд олон улсаас хүмүүнлэгийн тусламж хүссэн юм. ОХУ, Хятадаас хоёр аврах баг, тусламжийн бүтээгдэхүүний хамтаар Мьянмарт бямба гаригт тусламж иржээ. Энэтхэг улс аврах багийг хээрийн эмнэлгийн хамт илгээсэн бол Малайз ням гарагт 50 аврагч илгээнэ гэж мэдэгджээ. Хонконгийн 51 хүний бүрэлдэхүүнтэй баг есөн тонн орчим төрөл бүрийн тоног төхөөрөмжийн хамт өнгөрсөн шөнө Мьянмарт буулаа.
