АНУ-ын төв болон өмнөд хэсэгт Лхагва гаригт (2025.04.02) хүчтэй хар салхи дэгдэж, байшин, барилгуудыг сүйтгэн, цахилгаан дамжих шугам гэмтжээ. Тус улсын үндэсний цаг уурын албаны мэдэгдсэнээр, Лхагва гаригийн үдээс хойш дор хаяж дөрвөн мужид хар салхины тухай 15 гаруй мэдээлэл ирсэн байна. Кентакки, Арканзас мужид найман хүн бэртэж гэмтжээ.
Хар салхи үүссэнтэй холбогдуулан мөндөр, аадар бороо орж эхлэх үед Арканзас мужийн амбан захирагч Сара Хакаби Сандерс муж даяар онц байдал зарласан байна.
Үндэсний цаг уурын алба уг хар салхи Пүрэв гариг хүртэл үргэлжлэх тул ямар нэгэн аюулаас сэрэмжтэй байхыг анхааруулаад байна. Мөн хар салхинаас болж улс орныг хэдэн өдрийн турш сүйрүүлж болзошгүй гэж албаныхан эмээж буй. Хамгийн сүүлийн үеийн мэдээллээр, Миссури, Арканзас, Теннесси, Миссисипи, Индиана, Иллинойс, Кентакки, Оклахома мужуудад хар салхи, үер усны аюулаас сэрэмжлүүлэх онц байдал зарлажээ. Харин Арканзас, Миссури, Теннесси, Миссисипи мужуудад ойрын өдрүүдэд хүчтэй бороо орж, үерийн гамшиг тохиолдож магадгүй гэж үзэж байна. “PowerOutage.us” сайтад мэдээлснээр, шуурганд нэрвэгдсэн бүс нутагт 400 мянга гаруй өрхийн цахилгаан тасарчээ.
ЭХ СУРВАЛЖ: REUTERS
